En Marea recolle case 7000 sinaturas en 48 horas
A Xunta Electoral requiriu a En Marea que, nas 4 provincias, recollese aproximadamente 3000 sinaturas para poder presentarse ás eleccións xerais. En 48 horas, a formación recolleu máis do dobre das que se lle requiriran.
A Xunta Electoral, organismo encargado de velar pola transparencia e obxectividade do proceso electoral, considerou que En Marea non se presentara ás eleccións de 2016 como tal, ao concorrer baixo unha coalición de Podemos, Esquerda Unida, Anova e En Marea, motivo polo que nas 4 provincias se lle solicitou recoller sinaturas do 0,1% do censo da circunscrición.
A pesares de consideralo unha medida inxusta, dende a formación acatárono e, no prazo de 48 horas que se lles deu, reuniron case 7000 sinaturas, superando con moito a cifra de avais requirida.
Tanto nas provincias da Coruña, Lugo e Pontevedra recolleron o dobre de avais dos precisos, chegando na de Ourense a recoller case o triplo, pois dos 360 requiridos, colleron mais de 900.
Fai así unha demostración de forza a formación fronte aos menosprezos recibidos por parte de Gómez Reino, número un ao Congreso pola Coruña por En Común Podemos, quen aseguraba que á formación liderada por Luís Villares lle estaba custando recoller os avais precisos.
Precisábamos presentar ante a Xunta Electoral algo menos de 3.000 avais para podérmonos presentar ás Eleccións Xerais en todo o territorio galego, e temos 7.000! Case o TRIPLE do necesario! GRAZAS! 7.000 GRAZAS! 👏👏👏 #TiDecides #EnMareaContigo #MareaDeIlusión pic.twitter.com/XaMw3cw3CN
— EnMarea (@En_Marea) March 30, 2019