Denuncian portas xiratorias entre o PP e Povisa

Ante a información da existencia de negociacións entre POVISA-SERGAS para evitar a creba anunciada polo hospital privado con concerto singular, a Asociación Galega para a Defensa da Sanidade Pública emite un comunicado denunciando as portas xiratorias.

Dende a AGDSP consideran que “a crise dese hospital privado, que atende a doentes da Sanidade Pública está determinada por contas pouco claras, conflitos de intereses e portas xiratorias”. Engaden que a auditora de POVISA é Deloitte, “que participou na fusión das caixas galegas e na saída á bolsa de Bankia, e que non atopou os buracos millonarios destas entidades financeiras”. María Luisa Brand, que traballaba entón para Deloitte, foi auditora de Caixa Nova durante a crise e é a actual xerente de POVISA.  

Afirman no comunicado tamén que trala chegada de Feijoo ao goberno galego, Rocio Mosquera, directiva de POVISA, foi nomeada Directora Xeral do SERGAS e posteriormente Conselleira de Sanidade mentres María Luisa Brandt foi nomeada xerente de Galaria SA, empresa pública da Consellería de Sanidade. O Consello de Contas advertiu dos graves problemas da súa xestión e das contas pouco claras de Galaria, o que para a AGDSP “xera dúbidas sobre as contas que actualmente aporta POVISA para xustificar o pre-concurso de acreedores. Ademais, Rocío Mosquera, tras ser cesada na Consellería, substituíu a María Luisa Brandt en Galaria, quen á súa vez foi nomeada xerente de POVISA, como se fora “un intercambio de cromos”, pasando esta última “de xestionar unha empresa dependente da Consellería de Sanidade, con acceso á información sanitaria especialmente sensible dos pacientes da área de Vigo, Val Miñor e Morrazo, a xestionar o hospital de POVISA (privado, con concerto singular co SERGAS). 

O ofrecemento do PP a facerse cargo do gasto en medicamentos xerado no centro para doentes ambulatorios suporía que POVISA “prescribiría unha medicación (cada vez máis custosa) que sería pagada polo SERGAS” denuncia a AGDSP.

Polo exposto, dende a AGDSP instan á Consellería de Sanidade a que “faga pública a súa intención de non permitir a chantaxe empresarial e anunciar que, polo interese xeral, pasará a xestionar directamente o hospital POVISA, no caso de que a empresa non garanta a asistencia sanitaria da poboación asignada e os postos de traballo”. Tamén solicitan unha auditoría real e fan un chamamento ás forzas sociais, políticas e sindicais para que se estableza un plan a medio prazo, para ir substituíndo o concerto singular por recursos sanitarios públicos, “que permita rematar coa situación de chantaxe permanente que vivimos na área sanitaria de Vigo”.