Atalaya Mining, sen rumbo e á deriva
A través dunha nota de prensa conxunta, a Plataforma Veciñal Mina Touro-O Pino NON, Ecoloxistas en Acción de Huelva e Contraminacción alertan da caída en picado da multinacional mineira Atalaya Mining ao perder todo o gañado dende xaneiro.
Segundo afirman no comunicado, a multinacional tenta camuflar a realidade publicitando crecentes expectativas de produción de cobre na mina de Riotinto (Huelva), “imposibles de acometer, xa que as cousas non lle marchan ben á mineira, e os seus inversores están a darse conta”.
No último mes “as accións da empresa caeron en picado, ata un 35%, o que indica que perdeu todo o gañado dende xaneiro”.
Alén doutros problemas e sentenzas en contra, respecto ao Proxecto Touro a situación tampouco mellora para a empresa, pois o recente informe de ICOMOS, no que alerta do grave risco que a mina suporía para o Camiño de Santiago, podendo chegar a ser excluído da lista de Bens Patrimonio da Humanidade da UNESCO, non parece presaxiar un futuro moi esperanzador para a mineira en Galicia.
A situación actual de Atalaya Mining, “sen rumbo e á deriva”, aseguran dende a Plataforma Veciñal Mina Touro-O Pino NON , “non ofrece ningunha garantía, pero maior inseguridade debe ter quen teñen a responsabilidade de aprobar ou denegar este proxecto, xa que unha empresa con tal inestabilidade dificilmente ofrece garantías e moito menos no caso de ter que facer fronte a posibles indeminzacións por accidentes ou destrucións patrimoniais, de valor incalculable, ás portas do próximo ano Xacobeo 2021”.
