O BNG de Portas denuncia que o PP quere financiar a súa campaña electoral con cartos municipais
A través dun comunicado, o BNG de Portas (Pontevedra), denuncia que o Partido Popular compra candidato e ponlle un soldo municipal a sete meses das eleccións.
Denuncian que unha semana despois da presentación do candidato, nun acto arroupado por Alfonso Rueda, publicouse no Boletín Oficial de Pontevedra o recoñecemento da dedicación exclusiva ao concelleiro do PP, Ricardo Martínez Chantada, candidato do PP a substituír na alcaldía a Víctor Estévez.
Aseguran que “con ese soldo de 35.500 euros/ano, un simple tenente de alcalde de Portas cobra máis que alcaldes de concellos limítrofes máis grandes e poboados como Barro, Cuntis ou Moraña, incumprindo ademais o programa electoral co que se presentaron ás eleccións de 2015, no que se comprometían explicitamente a non recibir retribución algunha pola dedicación ao concello.
Afean dende o BNG que o PP “parasite as institucións, poñéndolle un soldo municipal ao seu candidato para que se dedique a preparar a tempo completo a campaña electoral, antepondo os intereses do partido aos da veciñanza”.
