Denuncian a eliminación do galego no Hospital Álvaro Cunqueiro
A Irmandade da Sanidade Galega (ISAGA) denuncia o proceso de eliminación do idioma galego que está realizando a Consellería de Sanidade no Hospital Álvaro Cunqueiro de Vigo.
Dende ISAGA, organización que ten por obxectivo fomentar o uso do galego no ámbito sanitario, aseguran que “non estaría moi satisfeito Álvaro Cunqueiro se observase o que sucede coa lingua galega no hospital que leva o seu nome”, pois segundo refiren, o galego está desaparecendo en varios ámbitos do hospital: no aparcadoiro, onde o sistema mecanizado emprega o castelán, nos ascensores, e mesmo están exclusivamente en castelán os impresos para as citas e consultas que expiden as máquinas ou os resultados analíticos.
Tamén afean que “o persoal que atende e informa aos usuarios nos mostradores emprega sempre o castelán, inda que se dirixan a eles en galego” e aseguran que “a historia clínica e a prescrición electrónica están programadas para empregar de xeito preferente o castelán e non o galego”.
Resposta da Valedora do Pobo
O organismo de defensa dos dereitos da cidadanía, en vez de reclamar á Consellería de Sanidade o cumprimento das normas e o respecto ás leis, emprega argumentos exculpatorios como que “o aparcadoiro está xestionado por unha empresa privada, o software das máquinas é instalado polo fabricante no idioma que el elixe ou que as analíticas están feitas por unha empresa multinacional”.
Ante esta situación, dende ISAGA ven “bochornoso e inxustificable que unha institución creada para a defensa do cidadán e dos seus dereitos actúe con esta complicidade coa Xerencia do hospital e a Consellería de Sanidade, que vulneran claramente a Lei de Normalización Lingüística”.
Isto non so acontece no Hospital Álvaro Cunqueiro, senón que, para ISAGA, “todo o sistema sanitario galego está a padecer un progresivo descenso no uso do noso idioma na práctica asistencial”, polo que reclaman á Xunta “que impulse e potencie o idioma propio na súa rede sanitaria e que a Valedora rectifique e actúe con firmeza”.
A Valedora xustifica o uso do castelán nos hospitais porque “están xestionados por empresas privadas”.
A Irmandade da Sanidade Galega (ISAGA), denuncia o “proceso de eliminación do idioma galego”. https://t.co/RG3daAbZq6 pic.twitter.com/zkkEkFoRSQ
— |SOMOS| (@Nova_Galiza) November 9, 2018
Pois resulta que agora o Servizo GALEGO de Saúde che da as citas en castelán, para que "lo entiendas bien". Que opina a @amesanl disto? pic.twitter.com/4LWrNYC6Cc
— Dani Conde 🌰🎗 (@DaniCondeGz) November 2, 2018