O MEL e a SGHN denuncian na Comisión Europea a contaminación de COREN na Limia
O Movemento Ecoloxista da Limia (MEL) e a Sociedade Galega de Historia Natural (SGHN) denuncian na Dirección Xeral de Medioambiente da Comisión Europea, da man de Lídia Senra, a contaminación de COREN na Limia.
Representantes de ambos colectivos reúnense na xornada de hoxe en Bruxelas, co Xefe da Unidade para o Uso e Xestión da terra e con persoal experto na xestión de nitratos da Dirección Xeral de Medioambiente da Comisión Europea nunha xuntanza facilitada pola eurodeputada galega Lídia Senra que ten por obxectivo trasladar en detalle a denuncia da vulneración de distintas directivas europeas na Limia por mor dos residuos producidos polas macrogranxas industriais.
Durante a súa estancia en Bruxelas, tamén manterán unha xuntanza con integrantes da Comisión de Peticións, pois ambas organizacións procederon ao rexistro o mércores pasado da denuncia na Comisión, solicitando “analizar a vulneración de directivas europeas, abrindo unha investigación e contactando coas autoridades competentes no Estado e a nivel galego, para que se paralice na comarca da Limia a instalación de novas granxas e sexan ordenadas as xa existentes para adoptar unha xestión ambientalmente sostible dos residuos agrogandeiros xerados que cumpra co dereito da UE”.
Enormes camións e tractores cisterna reparten puríns das granxas intensivas de Coren de forma abusiva pola Limia co consecuente cheiro constante e contaminación das augas. Denunciarémolo nas institucións europeas e galegas @DavideManzaneda pic.twitter.com/IvL1PmpTht
— Lídia Senra (@LidiaSenra) November 2, 2018