Luz verde no Congreso ao traspaso da AP-9 a Galicia
O Congreso apoiou onte a tramitación parlamentaria dunha Proposición de lei do Parlamento Galego para traspasar á Xunta a Autoestrada de peaxe AP-9 da que Ciudadanos se desmarcou por consideralo “un agasallo electoralista”.
A iniciativa, aprobada por unanimidade en Galicia en marzo de 2016, foi defendida no Pleno do Congreso por unha delegación de tres deputados do Parlamento autonómico.
O deputado do PPdeG, Martín Fernández Prado, destacou que a Xunta “ten os medios para xestionar a AP-9 ao ser a administración máis próxima e ser unha infraestrutura vital para Galicia, principal motor de competitividade”. Na mesma liña que se pronunciara o presidente da Xunta, Alberto Núñez Feijoo, pediu ao Goberno de Pedro Sánchez “convocar a comisión mixta de transferencias para asegurar que o traspaso non se dilate”.
Antón Sánchez, deputado de En Marea, lembrou que esta iniciativa “aprobouse tres veces por unanimidade no Parlamento galego e nas dúas ocasións anteriores foi bloqueada polo executivo popular”. Asegurou que “os galegos veñen padecendo unha estafa diaria coa AP-9, que no seu día foi rescatada con diñeiro público e privatizada polo goberno de José María Aznar no que se considera unha mostra de capitalismo de amiguetes”. Antón Gómez-Reino, deputado no Congreso por En Marea, reiterou o seu rexeitamento xeral ás autoestradas de peaxe “para que o público deixe de beneficiar á privada”.
Alexandra Fernández asegurou que “a presión social de galegas e galegos gañou o pulso a AUDASA”, afirmando que presentarán a solicitude de tramitación urxente da Lei.
O deputado do PSOE Guillermo Meijón cargou contra a empresa concesionaria e pediu “unha tramitación áxil da iniciativa e un consenso sobre a política deinfraestruturas”.
Ciuddanos, pola súa banda, negouse a votar a favor, alegando Fernando Navarro que “trátase dunha autoestrada que conecta con Portugal, o que a converte en vía estratéxica para o Estado” polo que criticou que se pretenda “o traspaso á Xunta da xestión, con opción a rescatala e fixar prezos, e en cambio as obrigas económicas sigan a cargo do Estado”. Para el, “os investimentos de Fomento son a bolsa de caramelos coa que se busca conseguir votos, e este traspaso é un agasallo que ten un custo que debe pagar o Estado” polo que resolveu cun “nós non aceptamos facer electoralismo cos investimentos, non aceptamos usar 500 millóns para pagar unha campaña electoral”.
Un debate que evidencia de novo a ruptura de En Marea no Congreso
Alexandra Fernández, voceira e experta de En Marea en infraestruturas e a AP-9, ademais de ser a deputada galega encargada de impulsar todas as iniciativas parlamentares ata a data na materia, tivo que observar como baixaba á tribuna a defender a posición do Grupo Antón Gómez-Reino, ante a sorpresa do resto de voceiros e grupos parlamentares.
A división visibilizouse no mesmo pleno, pois mentres o propio Gómez-Reino, Yolanda Díaz, Fernán Vello e Ángela Rodríguez ocupaban xuntos bancadas baleiras no hemiciclo, Alexandra Fernández quedaba no seu escano na sétima fila.
