O alcalde de O Pino tacha de pataleta o informe de ICOMOS sobre a mina
No último pleno ordinario do ano celebrado onte no Concello de O Pino, Manuel Taboada calificaba de “pataleta” o informe técnico de ICOMOS, o organismo asesor da UNESCO, sobre a afección da mina de Touro e O Pino sobre o Camiño de Santiago.
A través dun comunicado remitido pola Plataforma Veciñal Mina Touro-O Pino NON, informan que durante o último pleno ordinario do ano, no que os grupos da oposición (PSOE e BNG), presentaban conxuntamente unha moción solicitando a presentación de novas alegacións ao proxecto mineiro de cobre a ceo aberto tras coñecer os novos informes e documentos presentados pola promotora e o informe de ICOMOS sobre a afección da mina ao Camiño de Santiago como patrimonio mundial da UNESCO.
Segundo refiren, o alcalde, Manuel Taboada, informaba de que “a Xunta non remitira nova documentación ao concello, pero unha vez recibida, estudaríase e faríanse as achegas convintes”, ao tempo que, en relación ao informe técnico do Comité Internacional de Monumentos e Sitios (ICOMOS), “demostrou o seu total descoñecemento do mesmo, argumentando que parece que ICOMOS ven cunha pataleta, dicindo agora o que non dixo antes”.
Dende a Plataforma Veciñal Mina Touro-O Pino NON amósanse preocupados, pois refiren, “todo parece indicar que desde a Corporación Municipal nada se vai facer por protexer este ben patrimonio da humanidade que é, ademais, parte fundamental do tecido socioeconómico do municipio”.
Dende a Plataforma Veciñal xa entregaron as súas alegacións, asegurando que “a información aportada pola empresa evidencia que o proxecto non sufriu cambio substantivo, e seguen sen aportar toda a documentación requerida pola Administración. As eivas do Proxecto Touro seguen sendo as mesmas, polo que aínda teñen vixencia as declaracións do pasado mes de xullo do Conselleiro de Economía, Emprego e Industria, Francisco Conde, nas que recoñecía que o proxecto tal como está presentado, non é viable”.
“Parece que @ICOMOS_CNE ven cunha pataleta, decindo agora o que non dixo antes”. Así respostou esta mañán, en pleno municipal, Manuel Taboada, alcalde do Concello do Pino, á moción presentada pola oposición (@PSOE e @obloque).
👇👇👇https://t.co/Slapp8xa6w#MinaTouroOPinoNON— Mina Touro – O Pino NON (@minatouropinono) December 19, 2018
🔊Estamos presentando no Rexistro da @Xunta de Galicia as alegacións ao novo proxecto. Continuamos na loita. #MinaTouroOPinoNON pic.twitter.com/j65xSgF0kV
— Mina Touro – O Pino NON (@minatouropinono) December 18, 2018