Dimite José Araújo, voceiro do PP no Concello de Ourense
José Araújo anunciaba onte que deixa todas as súas competencias no goberno local de Ourense, así como o partido, mentres o seu nome soa como candidato de Ciudadanos nas eleccións de maio.
O voceiro do goberno local de Ourense e concelleiro de Infraestruturas e Medio Ambiente, José Araújo, renunciaba onte a todas as súas competencias na corporación municipal, deixando tamén a militancia no Partido Popular.
Na súa comparecencia ante os medios, manifestou o seu descontento coa dinámica municipal, afirmando que “goberno e corporación non cumpren coas expectativas da cidade”, pois asegurou que “un goberno non pode funcionar a base de selfies nin a base de insultos”, remarcando en Radio Ourense que esa “política de selfies non é so atribuíble ao alcalde, tamén á oposición”, á que acusa de “buscar nas alcantarillas a herba, a rata, o adoquín roto, en lugar de aproveitar a súa maioría para impoñer ao goberno cuestións como o Plan Xeral de Ordenación Municipal”.
Araújo recoñeceu ter conversas con outras forzas políticas, nomeando de forma expresa unicamente a Ciudadanos, afirmando que “o que me prantexo agora é reflexionar se me aparto da vida municipal ou continuo. Ábrese unha porta nova, cunha independencia que non tiña, espero que nun par de semanas saiba o que facer, pero os tempos os marco eu”.
Inda que non está nada fechado, en Ciudadanos verían con bos ollos a fichaxe, pois o secretario de organización da formación en Galicia destacou que Araújo é “unha persoa moi coherente e comprometida, e coñecida socialmente en Ourense”.
O alcalde de Ourense, Jesús Vázquez Abad, pola súa banda, dixo que “é unha decisión persoal” que respecta, inda que recoñeceu que o colleu por sorpresa, pois enterouse na mañá de onte, cando Araújo lle trasladou que era unha determinación “de carácter inmediato e non reversible”. Cuestionado pola repercusión de se decide fichar por outro partido, Vázquez indicou que “podería ser unha opción para abrir vías de negociación e diálogo”.