O PP usa orzamento público para facer campaña electoral de candidatos a alcaldes
A CIG-Autonómica ven de emitir un comunicado no que denuncia a utilización de cartos públicos para uso partidario do Partido Popular e a súa campaña electoral.
Segundo indican no sindicato nacionalista, “a Consellaría de Sanidade da Xunta organizou unha xornada na Coruña o día 14 de febreiro coa finalidade de promocionar a dous dos candidatos do PP a alcaldías de grandes cidades: Beatriz Mato, antiga conselleira de Política Social e candidata do Partido Popular á alcaldía da Coruña e Jesús Vázquez, antigo conselleiro de “Cultura”, actual alcalde de Ourense e candidato do PP á alcaldía desa cidade“.
A CIG indicou tamén que “a organización de actos coa única finalidade de dar visibilidade aos candidatos a alcaldías feitos desde a Administración é unha vulneración de calquera tipo de ética, desde a cristiana á agnóstica. A coorganización polo Cluster da Saúde de Galicia, outro chiringuito creado polo PP e presidido por Rocío Mosquera, exconselleira de sanidade, completa coa Fundación Barrié os organizadores do evento”.
O sindicato de clase remata o seu comunicado denunciando as prácticas do PP a respecto da xestión dos cartos públicos “Nunha mostra máis de como desde o Partido Popular se utilizan as institucións co orzamento que sae do diñeiro de todas e de todos nós para intereses exclusivamente partidistas”.
O PP usa orzamento público para facer campaña electoral de Beatriz Mato, exconselleira de Política Social e candidata do Partido Popular á alcaldía da Coruña e Jesús Vázquez, exconselleiro de “Cultura”, candidato do PP á alcaldía de Ourense. https://t.co/yMRg5N67tb
— CIG-Autónomica (@CIGAutonomica) February 19, 2019