Nace “As Eduardas”, un club de lectura feminista
Nace o club de lectura feminista da Asemblea de Mulleres de Galiza Nova co nome “As Eduardas”, en homenaxe á “Carta a Eduarda” e a Rosalía de Castro.
A iniciativa era presentada por Marta Gómez, responsable comarcal de Galiza Nova Pontevedra e Uxía Couto, responsable comarcal da Asemblea de Mulleres, que incidían en que “na actualidade do movemento feminista hai unha grande necesidade de formación, e por iso, dende Galiza Nova, como organización política que sempre tivo presente o feminismo como piar fundamental, queremos proporcionar este espazo de debate e formación en forma de libroforum”.
Será un espazo aberto, explicaron, no que “poderán participar todas as mulleres e mozas que así o desexen, todos os puntos de vista serán benvidos”.
O club de lectura terá a súa primeira xuntanza o luns, 4 de febreiro, ás 17:30h na Casa da Luz, e nela “expoñeranse os obxectivos do club e decidirase o primeiro libro para ler”. A segunda xuntanza, será o día 22 de febreiro, e será a presentación oficial do club, que contará coa presenza da autora para o debate do libro e tamén estará a voceira nacional do BNG, Ana Pontón.
Posteriormente, as xuntanzas realizaranse cada dous meses en distintos locais da cidade de Pontevedra.