“Defende a Galega” galardoada co Premio José Couso

“Defende a Galega”, a plataforma que inclúe ao persoal dos medios públicos galegos, recibirá o premio José Couso de Liberdade de Prensa.

Baixo o lema “Defende a Galega”, o colectivo recolle as reivindicacións do persoal dos medios públicos galegos, que levan protestando nos chamados “venres negros” cada semana dende maio de 2018 esixindo unha radio e televisión de calidade e sen manipulacións.   

“Defende a galega”, en defensa da radio e a televisión públicas, foi a candidatura elixida onte para recibir o XV Premio José Couso de Liberdade de Prensa, que homenaxean ao reporteiro gráfico asasinado en Irak.  

A entrega do premio levarase a cabo no Teatro Jofre de Ferrol o vindeiro 3 de maio.

Críticas de censura

A través das súas redes sociais, dende “Defende a Galega” aseguraban que a Radio Galega prohibira dar a nova sobre o premio no boletín das 13:00h, nunha mostra máis, para o colectivo, de censura e manipulación.