Xuventudes de Anova increpan a Villares durante a súa intervención
Os integrantes da mesa do plenario, críticos coa dirección de En Marea, impediron que o voceiro puidera rematar a súa intervención cando defendía a xestión da dirección de En Marea e censuraba algunhas actuacións dos críticos.
Durante a súa intervención, o voceiro de En Marea asegurou que mentiu ante os medios de comunicación cando lle preguntaron pola súa ausencia no aniversario de Ferrol en Común e dixo que “fora por problemas de axenda, cando a realidade é que non fora convidado”. Aseguro, ante o plenario, que o fixera “por gardar a casa”.
Mentres o voceiro facía estas declaracións, dende a mesa interrompíano para que terminase alegando “falta de tempo”, impedíndolle rematar o discurso, abandonando o estrado mentres os críticos o increpaban e os seus protestaban.
Non é a primeira vez que os críticos insultan a Luís Villares. No anterior plenario da formación, celebrado no mes de marzo, un numeroso grupo, entre quen se atopaban Paula Quinteiro, deputada de En Marea por Podemos e destacados dirixentes de Anova, aparecían nun vídeo gravado durante o xantar no que se mofaban do plenario de En Marea que estaba tendo lugar nese momento e proferían insultos machistas cara o voceiro da formación entre risas.
A interrupción da intervención de Villares foi respostada con insultos e berros por parte dos críticos mentres as persoas afíns ao voceiro recibíano entre ovacións.