Concentracións feministas contra as propostas de Vox
Miles de persoas concentráronse en Galicia na defensa dos dereitos das mulleres fronte ao avance da ultradereita.
O pasado martes houbo multitudinarias concentracións en 11 localidades galegas convocadas tralo pacto político en Andalucía entre PP, Ciudadanos e Vox. O obxectivo das protestas era defender os dereitos das mulleres e esixir que “non se dea nin un paso atrás na loita feminista” ante a “choiva de falacias da ultradereita”.
As concentracións remataron coa lectura dun documento que, no caso de Ourense, estaba apoiado por máis de 35 asociacións en defensa do feminismo, sindicatos e partidos políticos, no que se facía un chamamento a “tomar conciencia” e “saír á rúa para deixar claro que os dereitos das mulleres son intocables”.
Nas protestas rexeitáronse os recortes en igualdade e proclamouse que as mulleres non están dispostas a “quedar mudas”, pois “non hai pacto posible con aqueles que defenden as pretensións dos violentos”. “É bochornoso”, aseguraron “que neguen a realidade cando só un 30% dos casos de violencia machista se denuncian en España, e dun total das 1,2 millóns de denuncias presentadas entre 2009 e 2017, só 96 resultaron falsas”, segundo datos da Fiscalía Xeral do Estado.
Defenderon tamén que a igualdade “non se vende” e que os dereitos das mulleres “non se negocian”, á vez que rexeitaron a equiparación da violencia doméstica coa violencia machista, pois segundo explicaron, isto supón “negar o seu carácter estrutural e minimizar intolerablemente o milleiro de vítimas mortais rexistradas dende 2003”. Na lectura do manifesto, tamén aseguraban que “a ultradereita non se quere afastar da ideoloxía patriarcal. Parece que o seu triunfo dependerá de afastarnos do escenario político-social devolvéndonos ás cociñas”.
A Praza Maior de Lugo encheuse de feminismo e antifascismo, a xente quere igualdade e democracia. Non quedaremos na casa con medo ante os fascistas de VOX e os seus cómplices de C’s e PP. #NinUnPasoAtrás pic.twitter.com/k5nQbsqhWb
— Plataforma Feminista de Lugo (@Lugo_Feminista) January 15, 2019
En Monforte tamén se berrou contra o pacto da vergoña. Cos nosos dereitos non se negocia! Solidariedade coas mulleres andaluzas #stopmachismo pic.twitter.com/d2vOHs19xI
— Paula Vázquez Verao (@paulaverao) January 15, 2019