Lídia Senra esixe á UE a inmediata aplicación da Declaración dos dereitos labregos aprobada pola ONU
A eurodeputada galega Lídia Senra pregúntase que hai detrás da abstención maioritaria dos países da UE na votación da ONU sobre a Declaración dos dereitos labregos.
A Terceira Comisión (Social, Humanitaria e Cultural) da Asemblea Xeral da Organización das Nacións Unidas (ONU) aprobou o pasado luns 19 de novembro a “Declaración das Nacións Unidas sobre os Dereitos dos Labregos e doutras persoas que traballan nas zonas rurais” por 19 votos a favor, 7 en contra e 49 abstencións. Este documento, que deberá ser ratificado en decembro, toma como base a Declaración dos Dereitos das Labregas e Labregos do movemento social labrego mundial La Vía Campesina (LVC), do cal o Sindicato Labrego Galego forma parte en Galiza.
A comparecencia sobre esta Declaración foi desprazada ate o último lugar da axenda de traballo, limitándose o tempo para o seu tratamento e debate, o que Lídia Senra criticou, por parecerlle lamentable “que para unha vez que se aborda nesta comisión unha cuestión relacionada cos dereitos das labregas e labregos deixemos o último minuto e non poidamos ter un debate tranquilo”.
Na súa intervención, a coordinadora do Grupo da Esquerda Unitaria Europea/Esquerda Verde Nórdica na Comisión de Agricultura e Desenvolvemento Rural do Parlamento Europeo felicitou o traballo levado adiante polo movemento labrego mundial La Vía Campesina dende o ano 2001 e as súas organizacións aliadas, asegurando que “a aprobación desta Declaración é un feito realmente importante para todo o planeta”, salientando tamén que “resulta moi chamativo que toda a UE, agás dous votos a favor e tres en contra, se abstivera na votación.
A eurodeputada Lídia Senra salientou que agarda que “tanto os Estados membro como a UE no seu conxunto rectifiquen, asuman e implementen este texto inmediatamente. En decembro terán a oportunidade de ratificalo, e sería intolerable que a UE, que tantas veces pretende erixirse en defensora dos dereitos humanos, non secundase esta Declaración”.
