232 persoas ratifican a Xulio Ferreiro como candidato da Marea Atlántica
As primarias da Marea Atlántica ratificaron a Xulio Ferreiro como candidato á alcaldía da Coruña con 232 apoios.
Dende a Marea Atlántica aseguran que “estas primarias conclúen máis dun ano de traballo, especialmente intenso nos últimos dous meses, para fomentar o debate interno, escoitar todas as voces e preservar o espazo político que construímos en 2014”.
A votación que pechou o proceso de primarias da Marea Atlántica ratificou a Xulio Ferreiro como candidato á alcaldía da Coruña nas eleccións municipais do 26 de maio. 232 persoas apoiaron a lista encabezada polo actual alcalde.
Segundo informou a Marea Atlántica ao dar a coñecer os resultados provisionais, o total de votos emitidos foron 247, dos cales 232 foron para a candidatura de Ferreiro e 15 en branco. Os resultados definitivos proclamaranse o día 21 de febreiro.
As 20 persoas que acompañarán a Xulio Ferreiro na súa candidatura pasarán a ocupar os 20 primeiros postos da lista electoral da Marea Atlántica, mentres que os nomes do 21 ao 27 decidiranse nunha Rede o vindeiro 28 de marzo.
Abrirían así a candidatura da Marea Atlántica ás eleccións municipais:
- Xulio Ferreiro (Alcalde da Coruña. Profesor titular de Dereito e maxistrado suplente da Audiencia Provincial de Lugo).
- María García (Concelleira de Medio Ambiente).
- Xiao Varela (Concelleiro de Rexeneración Urbana).
- Silvia Cameán (Concelleira de Xustiza Social).
- Alberto Lema (Concelleiro de Economía Social e Emprego).
- Claudia Delso (Concelleira de Participación).
- Iago Martínez (Xefe de Gabinete da Alcaldía do Concello da Coruña e membro da Coordinadora da Marea Atlántica).
- Isabel Faraldo (Traballadora do Servizo Galego de Saúde).
- Susana Soneira (Decana do Colexio de Graduados Sociais da Coruña e Ourense e vicepresidenta do Consello Xeral de Graduados Sociais de España).
- Javier Pérez (Profesor de Formación e Orientación Laboral no CIFO Anxel Casal).
- Natalia Balseiro (Profesional do eido cultural, durante trece anos na administración pública e outros cinco como independente).
- Adrián García Seijas (Formado en Ciencias Políticas e Asesoramento Xurídico en Medio Ambiente. Traballador en precario do telemarketing. Integrante do comité de empresa de Extel na Coruña).
- Leticia Barbadillo (Comunicadora e profesora en formación. Activista pola educación pública e os dereitos das persoas diversofuncionais).
- Mariano Fernández Cabarcos (Autoempregado da xestión cultural e socio fundador de CUAC FM).
- Gema Rivera (Enfermeira e xubilada. Sindicalista. Comprometida na comunidade educativa).
- Antía Garrote (Titulada en Humanidades e traballadora en precario. Vencellada aos movementos estudantís por un ensino público de calidade).
- Rubén Pérez (Activista dos dereitos e o benestar animal. Impulsor da eliminación das touradas na Coruña).
- Ángeles Huerta (Cineasta, profesora da Escola de Idiomas da Coruña, doutora en Literatura Comparada e premio Mestre Mateo 2017 ao mellor documental).
- Ricardo Cao (Catedrático de Estatística na UDC, da que foi vicerreitor entre 2012 e 2015. Defensor da universidade pública).
- Stephanie Ordóñez (Xornalista. Licenciada en Filoloxía Hispánica. Activista social e ecoloxista).
Despois dunha fin de semana de votacións, e máis dun ano de traballo, as #primarias da @mareatlantica ratifican a @XulioFerreiro como candidato á alcaldía da Coruña. https://t.co/eARWaUrhFe
🗳 Votos totais: 247.
🔵 Candidatura de Xulio Ferreiro: 232.
⚪️ En branco: 15.— Marea Atlántica (@mareatlantica) February 18, 2019