Sabela Ramil: “O respecto ás culturas e loitar por un rural vivo son parte da miña vida”
Sabela Ramil, a cantante pontesa finalista de Operación Triunfo, sempre amosou o seu compromiso tanto coa súa familia como coa súa terra
A maneira de concursar de Sabela Ramil amosou a súa personalidade, deixou unha impronta indeleble. Dende a súa primeira nominación escolleu cancións en galego, e fíxoo, como ela mesma asegurou porque o vía natural, por ser “temas que eran importantes para min, que tiñan un significado na miña historia de vida, ademais de que musicalmente podía sacarlles partido”.
Sabela puxo o foco na cultura galega nun espazo estatal de máxima audiencia como foi Operación Triunfo. Con “Benditas feridas”, canción de Rosa Cedrón, escollida por Sabela, foi a primeira vez que soou un tema en galego no concurso, mais non sería a última.
“Tris Tras”, de Marful, foi a peza escollida pola cantante para interpretar na final do concurso. A autora, Ugia Pedreira, natural de Vilaronte, amosoulle o seu agradecemento a sabela, desvelando que a canción se xestara na serra da Gañidoira, de onde procede a familia de Sabela.
O que para ela é normal, “o respecto e o valor das culturas como un eixo de unión das persoas e non de sesgo”, houbo quen o cualificou como o maior xeito de “normalizar o uso do galego dende o Xabarín Club”, considerando a Sabela como unha “embaixadora da cultura galega”.
VIDEO HD | Sabela cantando “Tris Tras” en #Ourol #RecepcionSabela pic.twitter.com/sge4fap6gC
— News Sabela Ramil 🐚 (@Newssabela_) January 5, 2019