Vitoria por partida dobre do Auriense na Liga Galega

O pasado domingo regresaba o fútbol gaélico a Ourense en dous partidos que enfrontaban ás equipas do Auriense coas do Turonia Gondomar, acadando ambas vitorias as equipas locais.  

Regresaba así o fútbol gaélico ao sintético da universidade, desta volta cun gran ambiente nas gradas para ver o debut da equipa feminina do Auriense.

Con igualdade dende o primeiro minuto e intercambio de goles, a equipa local estivo por diante practicamente todo o encontro, pero as rapazas de Gondomar nunca lle perderon a cara ao partido, tendo sempre a opción de remontada. Cun final de infarto, o resultado cae do lado local por un 6-11 (29) vs 5-09 (24).

Posteriormente tocaba a quenda dos rapaces. Nun partido igualado os primeiros 5 minutos, o Auriense mostrouse contundente e sentenciou o partido antes de chegar ao descanso, cunha vantaxe de 20 tantos. A intensidade do partido foi decrecendo no segundo tempo ata chegar ao final cun resultado para os locais de 8-19 (43) vs 0-09 (09).

A vindeira fin de semana, choques importantes para o Auriense, que despraza a ambas equipas ata A Coruña, para xogar contra Fillos e Fillas de Breogán. Dous partidos de altura entre equipas da parte alta da clasificación.