Podemos, EU e Anova claman pola unidade tras romper con En Marea
Tanto Podemos como Esquerda Unida e Anova apostan abertamente pola coalición, tras romper con En Marea ao non presentarse ás primarias da formación.
Podemos Galicia, ante o novo reto electoral, fai unha proposta que pasa por “recoñecendo o positivo do construído en decembro de 2015 e xuño de 2016 tecer unha alianza electoral en forma de coalición, enmarcada na alianza confederal e plurinacional do conxunto de actores do cambio do Estado”.
Pola súa banda, en Esquerda Unida, mentres Yolanda Díaz fai un chamamento a Villares para que En Marea se sume á coalición que pretende reeditar o pacto de esquerdas galego que se presentou ás eleccións de 2015, sumándose así á oferta feita pública tamén polo voceiro de Anova, Antón Sánchez e o alcalde da Coruña, Xulio Ferreiro. A ese chamamento, non se sumou Eva Solla, a coordinadora nacional de Esquerda Unida, asegurando que “as conversas entre Anova, EU e Podemos para reeditar o acordo estaban moi avanzadas, sen que houbese ningún tipo de contacto con En Marea, que xa tiña o seu proceso de primarias”.
O voceiro nacional de Anova, Antón Sánchez, aseguraba nunha entrevista que “a consecución dunha fronte ampla de esquerdas de cara ao 28-A sería a alternativa idónea” e que “a incorporación de En Marea dentro dela sería unha boa nova”, enfatizando que “o noso chamamento non ten exclusións, non está pechado a ningunha forza de esquerdas”.
En Marea confirmaba onte as candidaturas que se presentarán ás eleccións xerais e europeas. Os cabezas de lista sairán das votacións que se celebrarán do venres 8 de marzo ao domingo 10, tendo o mércores 13 aos candidatos definitivos.
A organización semella seguir apostando por presentarse como formación propia, pois a coalición, alén de non permitir presentarse a calquera persoa, como si se pode facer nas primarias, non permite obter grupo parlamentar propio.
Fontes próximas á dirección de En Marea critican a actitude das cúpulas de Podemos, EU e Anova, pois aseguran que as súas formacións teñen cabida en En Marea, nomeadamente no Consello das Mareas, onde as persoas inscritas decidiron que estiveran e non se presentaron a ningún deles dende a constitución da nova dirección, alén de desmarcarse e non participar no proceso de primarias da formación na que se integraban e rachar con ela, polo que semella difícil artellar un relato de unidade popular con eses precedentes.