Malestar no BNG pola presencia de Ana Pontón nun acto con Felipe VI
O Rei Felipe VI entregou este galardón da Voz de Galicia a Rebelo de Sousa, presidente da República Portuguesa, elixido polo xurado “por favorecer que as relacións transfronteirizas entre España e Portugal sexan na actualidade un modelo de cohesión e bo facer para a Unión Europea”.
O acto de entrega do premio reuniu no Museo Santiago Rey Fernández-Latorre ás personalidades máis relevantes da política, a empresa, a cultura e a sociedade galega, entre quen se atopaban o presidente e editor de La Voz de Galicia, Santiago Rey Fernández-Latorre, o presidente da Xunta de Galicia, Alberto Núñez Feijoo, a ministra de Facenda, María Jesús Montero, o presidente do Parlamento, Miguel Santalices, o voceiro do PSdeG, Xaquín Fernández Leiceaga, o secretario xeral do PSdeG, Gonzalo Caballero, a voceira do BNG, Ana Pontón, e o do PP, Pedro Puy, a candidata do PP pola provincia da Coruña, Beatriz Mato, a deputada de En Marea por Podemos, Carmen Santos, o presidente de Inditex, Pablo Isla, o presidente de Abanca, Juan Carlos Escotet, a vicepresidenta da Fundación Amancio Ortega, Flora Pérez, ou a presidenta do Consello da Cultura Galega, Rosario Álvarez. Entre as ausencias destacan a dos alcaldes das cidades da Coruña, Compostela e Ferrol e tampouco acudiu o voceiro de En Marea, Luís Villares.
Sectores do BNG están molestos pola nutrida representación da organización frontista no acto dun medio que lle foi hostil durante a súa etapa no goberno bipartito aínda que desculpan a presencia dos seus líderes polas boas relacións que manten a actual dirección co medio coruñés.
A páxina satírica Troleada Galega que publican membros do partido non perdeu oportunidade de soltarlle un zasca a Ana Pontón indicando que estaba de palmeira no acto fascista de Santiago Rey con Felipe VI.
