Mobilización contra a censura no IES de Cedeira
A retirada dunha mostra de poesía no IES de Cedeira provoca a mobilización do alumnado promovendo a liberdade de expresión e denunciando a censura.
A mostra, unha exposición de poemas creados polos 67 estudantes de 4º da ESO nun obradoiro promovido dende a biblioteca escolar, inaugurouse o 21 de marzo, Día Mundial da Poesía, e desmontouse de súpeto o 29, por mor dunha denuncia anónima provinte do claustro de profesores.
A polémica saltou por un poema asinado por alumnas do IES Punta Candieira, de Cedeira, no que ironizaban sobre os odios do escritor Rafael Sánchez Ferlosio, suscitando o debate frases como “á cor vermella, aos fachas, á sociedade na que vivimos, á xente hipócrita, aos clichés, á fantasía pintada de rosa, a España, á tauromaquia, aos acoso…”.
Mentres a responsable do Instituto limitabase a dicir que “todo está en mans da Inspección Educativa e da Xefatura Territorial de Educación”, dende a Consellería negaban ter ordenado quitar a exposición, apuntando, así e todo, “a existencia dun texto que fomenta o sentimento de odio, algo que non ten cabida nun centro educativo”.
Como xeito de protesta, o alumnado acudiu a clase vestidos de negro e nos dous recreos da maña protagonizaron sentadas na entrada do centro, con proclamas contra a censura e en defensa da liberdade de expresión.
O alcalde de Cedeira respaldou ao alumnado asegurando “ninguén entende que se poida censurar a palabra, ninguén entende que se poida censurar a liberdade de expresión, ninguén entende que se poida censurar o pensamento duns alumnos dun centro educativo…. avanzamos ou retrocedemos? Eu digo non á censura”.
A favor da retirada da mostra posicionouse, pola súa banda, a Asociación Hablamos Español, que preside Gloria Lago, trasladando unha queixa á Xunta polos contidos da páxina de Facebook da biblioteca do IES, que, segundo indican “non se corresponden coa neutralidade ideolóxica debida”.
Este poema foi o que censuraron no IES de Cedeira, nun acto absolutamente reprobábel. É unha clara demostración de que pode odiar todo o que sexa….agás España. pic.twitter.com/HtZbOuTPO6
— Suso Bermello (@susobermello) April 1, 2019