Abel Caballero acusa a En Común Unidas Podemos de colonialismo político
O alcalde de Vigo acusa a En Común Unidas Podemos de “colonialismo político” valéndose da orixe ferrolá de Yolanda Díaz.
O rexedor vigués afeou a En Común Unidas Podemos que a candidata que presentan por Pontevedra, Yolanda Díaz, excoordinadora xeral de Esquerda Unida en Galicia, sexa natural de Ferrol, presentándose por unha circunscrición diferente á súa.
Caballero esixiu que os candidatos “sexan da demarcación, porque o paracaidismo político xa é moi vello”.
Rubén Pérez carga contra Caballero
Rubén Perez saiu ao paso das críticas de Abel Caballero lembrándolle que o propio rexedor fora deputado pola Coruña, sinalando que “se acusa a si mesmo de colonialismo político”, “unha práctica moi habitual no PSOE”, asegurou, para logo indicir en que “non imos entrar nese localismo cateto de chamar colonialismo a iso, hai que estudar historia para saber o que é o colonialismo”.
Iris Malvido afea a Díaz a súa posición sobre ENCE
Durante o debate entre as candidatas ao Congreso, a candidata de En Común, Yolanda Díaz, apenas fixo alusión á problemática de ENCE, algo que o candidato de En Marea por Ourense, Iván Olmos, puxo enriba da mesa durante unha das súas intervencións, o que fixo que a través das redes sociais a tamén candidata de En Marea por Pontevedra, Iris Malvido, parabenizase ao seu compañeiro, asegurando “dende a provincia de Pontevedra sentinme súper ben representada cando non esquivaches a pregunta de ENCE, cómo si fixeron outras a pesares de vir pola nosa provincia, cando falaches de desenvolvemento económico e como este está ligado a vertebración do territorio (saída sur Vigo, conexión entre portos)”.